Home sweet home

Eftir yndislegt ferðalag með vinkonu minni og strákunum okkar komum við heim seinnipart gærdagsins.

Við fórum austur hringinn byrjuðum á að sækja minn herramann á Selfoss, en þar beið hann hjá föður sínum og stóra bróður.  Þaðan héldum við í Loftsalahellir en vegna varps í Dyrhólaey þá var hún lokuð.  Loftsalahellir er gamall þingstaður Mýrdælinga. Flottur hellir á pöllum.  Eftir skruppum við í Reynisfjöru sem er í miklu uppáhaldi hjá mér.  Auðvitað var svo kaffi í Víkurskála og litið við í Víkurprjóni, þar keyptum við mæðginin okkur spil með íslenskum fuglum. Spiluðum þó nokkuð marga veiðimenn í ferðinni og báðum um Súlu, Skógarþröst og Fálka í stað hinna hefðbundnu.

Fyrstu nóttinni eyddum við svo á Geirlandi á Síðu.  Rosalega falleg og góð gistiaðstaða þar. Eftir dekur morgunmat á Geirlandi héldum við svo af stað aftur og stoppuðum við Foss á Síðu, Dverghamar og auðvitað á Núpsstað skoðuðum bænahúsið og staðinn sjálfan, jeppinn var náttúrulega lang flottastur, ég sagði strákunum allar þær sögur sem ég gat romsað upp og reyndi að uppfræða ungdóminn sem mest. Ekki alltaf við mikinn fögnuð eða mikla trú á gamlar þjóðsögur.   Héldum áfram yfir Skeiðarársand alger eyðimörk var upplifun Gabríels, en Þrösturinn minn hefur farið þarna oftar um og hlustað á móðurina segja sögur af jökulhlaupum og gosum í jöklinum.  Skýin skyggðu á fjallasýn því miður svo að ekki sáum við Hvannadalshnjúkinn í þetta skiptið.  Skaftafell var næsta stopp og tekinn göngutúr upp að Svartafossi, ekki allir svaka kátir með það en í rólegheitum röltum við Þröstur þetta í humátt eftir Þóru og Gabríel.  Niður aftur og áfram var haldið í einum rikk í Jökulsárlónið.  Stoppuðum þar stutt, og beint á Höfn og tekin olía á bílinn og kaffiáfylling á okkur dömurnar.  Endurnærð héldum við í Lón. Skoðuðum steina og keyrðum þar inn eftir í litadýrð Líbarítsins.  Héldum svo ferðinni áfram í Breiðdalinn þar sem næstu þrjár nætur voru pantaðar.  Fengum þar þetta líka fína sumarhús fyrir okkur.  Í rigningu á mánudegi skelltum við okkur í sund á Djúpavogi. Þar er að mínu mati besta innisundlaug landsins.  Heitir innipottar en samt ekki bergmál og gufa eins og víðast.  Vel heppnuð íþróttamannvirki þar.   Þriðjudaginn 17 júní fórum við svo á Stöðvarfjörð og skoðuðum Steinasafn Petru.  Þangað vorum við báðar að koma í fyrsta skipti og vorum svo sannarlega eins og litlar stelpur að bíða eftir jólunum.  Safnið er í einu orði Stórfenglegt.  Og móttökurnar sem ungu konurnar barnabörn Petru gáfu okkur voru hlýjar og heimilislegar.  Takk fyrir okkur.  Ég á svo sannarlega eftir að koma þangað aftur og skoða miklu betur, ég lærði meira um steina í þessari heimsókn en af öllum lestrinum í steinabókum sem ég hef komið höndum yfir hingað til.  Tók helling af myndum líka og versluðum okkur hálsmen mæðginin og okkur til mikillar skemmtunar þá völdum við bæði Mosaagat steina um hálsinn.  Svakalega ólíka samt.  Við keyrðum svo áfram yfir á Fáskrúðsfjörð, stoppuðum við Vattanes, en þar ólust foreldrar vinkonu minnar upp. Fundum fallega steina við Vattanesið og héldum glöð í bragði áfram á Reyðarfjörð.  Ákváðum að fara göngin til baka í bústaðinn.   Morguninn eftir var haldið á Egilsstaði.  Tókum þar útúrdúr og skelltum okkur upp á Kárahnjúka, í slyddu tókum við þar myndir yfir lónið, fengum okkur svo kaffi í miðstöðinni þar, en hún var einmitt opnuð daginn áður. Ekkert smá heppnar þar.  Keyrðum til baka "öfugumegin" við Lagarfljótið, eftir að hafa skoðað kirkjuna á Valþjófsstað. þó aðallega hurðina.

Eftir stutt stopp í Kaupfélagi Héraðsbúa var brunað að Mývatni þar sem næsti gististaður beið.  Fórum samt fyrst í bað í Jarðböðunum við Mývatn.  Það var bara geggjað.  Frábært að geta slakað svona vel á eftir mikla keyrslu.  Eftir góða næturhvíld skoðuðum við Dimmuborgir, Dettifoss, Hljóðakletta og rétt kíktum á Ásbyrgi.  Þurftum að vera komin á Húsavík fyrir klukkan 6.  En þar voru drengirnir mest spenntir fyrir að skoða Reðursafnið.  Þeim fannst þetta eiginlega of vísindalegt safn.  Gaman að hafa skoðað þar engu að síður.  Akureyri var svo loka stoppið.  Við ákváðum að slaka þar bara vel á og tékkuðum okkur inn á gistiheimili í þrjár nætur.  Lágum í sundi, kíktum á Jólagarðinn, röltum um og strákarnir fóru í bíó. Í einni gönguferðinni rákumst við Þröstur á ofsalega flott gallerí með varning sem ég  hef hvergi séð annarstaðar. ICENATIVE er nafnið og fjöllistakonan Þórey er snillingur í höndunum.  www.midnight1977.com er linkurinn hennar.

  Heimferðin var svo með stoppi á Hvammstanga, þar kíktum við á gallerí Bardúsa  (Ekki Bóthildi eins og ég gerði mig seka um að kalla þetta ljómandi fína handverks hús) og verslunar safnið ætluðum að kíkja á Selasafnið en aðgangshörð Kría hélt gestum frá. 

Þegar heim var komið tóku á móti okkur glaðir fjórfætlingar sem biðu heima með heimasætunni. Hún var líka kát að fá mömmzluna sína og litla bróðir. Þetta er leiðinlegt til lengdar að vera ein heima og hafa engan til að elda fyrir sig 

Set inn myndir við tækifæri. 

Svo er litli minn að fara með pabba sínum og fjölskyldu til Portugals í tvær vikur. Verður gaman fyrir stákinn enda spenntur eins og vera ber

Athugasemdir

[Aprílrós, 24.6.2008 kl. 02:14]

Gott hjá ykkur að fara í smá ferðalag, maður kemur heim alveg endurnærðu og jafnvel þreyttur en þreyttur á jákvæðan hátt ;). Ég fór í fyrra með syni mínum þá 12 ára, vorum við bara tvö og bætti það heldur betur samskiptin hjá okkur. Við vorum alsæl með ferðalagið sem var hringurinn og hinir ýmsu áningarstaðir. Við spiluðum á kvöldin og eða leystum krossgátur og sögðum brandara og gátur. Ekkert sjónvarp , bara útvarp. og náttúran. Við vorum 8 daga en ætluðum að vera 10 daga, en það varð svo hvasst á Höfn í Hornafirði að við renndum bara í bæinn alla leið, en við fórum norður leiðina.

Kveðja Guðrún Ing

[Hallfríður Jóna Jónsdóttir, 24.6.2008 kl. 19:43]

Já þetta er bara yndislegt.

Við tókum tæknilausa viku fyrir nokkrum árum en þá vorum við tvö skálaverðir á Fimmvörðuhálsi.

Bæði munum við þá viku sem sæluviku

[Þorvarður G (IP-tala skráð) 26.6.2008 kl. 11:16]

Sæl föðursystir.

Gott hjá ykkur að rúlla hringinn rangsælis. Ég verð þó að leiðrétta þig um smávegis í okkar heimabyggð. Galleríið á Hvammstanga heitir Bardúsa en ekki Bóthildur.

Hefði glaður tekið á móti ykkur ferðalöngunum hér á Reykjaskóla, svona í síðasta sinn.

Kv.
Hinn síungi bróðursonur

[Hallfríður Jóna Jónsdóttir, 26.6.2008 kl. 21:24]

Takk minn kæri ungi bróðursonur .... Mér fannst þetta líka vera svona næsti bær við en lét vaða.  Það er svona þegar maður nennir ekki að leita í símaskránni þegar maður bloggar.  Ég hefði kíkt við og athugað ef bara við mæðgin hefðum verið á ferðinni en ferðalúnir ungir herrar búnir að fá nóg hvor af hinum flýttu för okkar suður á Skagann

En ég leiðrétti þessi mistök hið snarasta